P4O 曬後護理蘆薈啫喱 200ml

呢支Aftersun好正。上個月有一日快閃無搽防曬下去左沙灘，結果曬到變關公，屋企支 aftersun又過左期變臭。無意中發現呢支gel，見佢話Organic又澳洲又唔算貴又大大支咁，即刻落單第二日收工直接去拎貨。 一打開有淡淡既薰衣草味，半透明啫喱狀搽上手臂好水潤，涼涼浸浸吸收得好快，呢頭搽頭轉個頭已經吸收哂。本身塊面同膊頭位係曬傷到第二晚都仲好痛，搽咗上面同身好似有減溫作用，本身刺痛感都減退左好多。本身玩開水所以皮膚都唔算好，都預左咁曬法實會曬到好粗糙。好驚喜係今次皮膚搽左之後，反而比之前滑左，連手㬹膝頭都平滑左好多。面部好好彩曬到咁都無甩皮，曬傷後既出油情況亦改善左。膊頭都只係甩皮甩左少少。因為好水潤又好吸收，呢排Keep住都仲有當body cream搽，幾抵用。